蘇副局show卡片撻朵醜聞越揭越臭，有入境處人員向《蘋果》爆料，指處方優待權貴，所謂「蟲case」陋習由來已久，唔少人對「蟲case」呢個行動代號十分好奇，質疑點解唔係龍case，唔係蛇case呢？
源自殺蟲水廣告
有部門老鬼話畀八方知，「蟲case」呢個代號係有典故嘅，源自80年代一個殺蟲水廣告，描述一群曱甴、昆蟲去地下大檔賭錢，㩒門鐘入場時，睇場問佢哋「搵邊個？」成班曱甴就答一句暗語：「阿蟲介紹我嚟嘅！」
呢個廣告當年深入民心，相信唔少人記憶猶新，而上述入門暗語亦成為經典金句，入境處內部將之簡化成「蟲case」，唔係生安白造。
咁係咪代表「蟲case」始自上世紀80年代呢？八方認為唔係，玩特權嘅事古已有之，今有副局長，昔有董A1，只要呢個世界有權貴同有擦鞋仔，自然會有「蟲case」，好似曱甴咁，趕之不絕，殺之不盡。