一位老友介紹認識一位青年才俊，只有二十七歲，講起股市、投資、上市事宜，十分熟悉，豈止有板有眼，直情令左丁山吃了一驚，急忙問佢在那間大學畢業，佢話在科技大學畢業，跟過鄭國漢教授，讀中學時最崇拜張五常，現在就只係相信市場商機，對大塊理論文章敬而畏之咯。
科技大學學生有咁醒？左丁山識得少，第一次見到啫，再問佢去過海外交流未？才俊M話：「未噃，讀科大時最想去UCLA交流，但爸爸係要我去北京，於是到北大交換咗一年，咁就得咗！好彩冇去美國啫。」跟住佢講吓一段古。話說爸爸送佢去北京入讀北大，首先帶佢到北京遊覽，住在接近北大嘅城西香格里拉酒店，約一個星期後，正式入住北大宿舍，才俊M話直情有cultureshock，從天上撻落凡塵，宿舍床位太硬，公廁只有踎廁，飯堂排長龍，有錢買唔到好嘢食，卒之捱咗個幾月，先至「清洗」晒香港學生基因，適應下來，捱完一個學年，學得一口標準普通話，建立內地人脈網絡；現時才俊M經常穿梭內地做生意，如魚得水，內地人仲以為佢係北方人到廣東㖭。
未必位位學生都好似才俊M咁，可以融入內地，大展拳腳嘅，但左丁山有時見到啲香港畢業男生，二十五、六歲咯，仲係晚晚掛住上網打機，對中國內地情況不甚了了，對世界大勢不置可否，冇法子唔擰擰頭，相形之下，就覺得才俊M特別不同。
不過年青人有的是時間，只要肯努力學習，真係莫欺少年窮。令人痛心者，乃係幾十歲人，頭腦仍然唔化，混淆概念。電盈私有化事件雖然仍待上訴庭裁決，但高等法院法官關淑馨嘅判詞寫得十分清楚（第128段），佢不明白潘松輝與馮華健何解要求法庭考慮道德層面，之前（126段），佢已引述個案，講"acourtoflawisdistinguishedfromacourtofmoralityorconscience,ifsuchacourtexists!"但一啲香港評論員仍然大聲呼嚷香港法庭不顧道德，香港金融中心地位不保！左丁山見到才俊M，睇到香港未來希望，見到呢類評論，就為香港前途焦急。