我髮型師話佢好鍾意投注日本波，無他嘅，晏晝開波，時間好到爆，其中浦和紅鑽更加係佢嘅至愛，可惜紅鑽由上屆開始已走樣，頹勢仲持續至今屆。紅鑽向下沉，但天鵝就起緊，開季4場聯賽3勝1和，周六作客京都不死鳥有力添食，就博個有40倍嘅贏3:0波膽。
不死鳥今屆打咗6場波，淨喺關西打吡贏過神戶勝利船同埋大阪飛腳，其餘4場就輸晒。雖則佢哋防線有日本小國腳水本裕貴，但對上5仗場場失波，而且今仗連識得入波嘅佐藤勇人、柳澤敦同埋保連奴都冇埋，真係唔知點踢。
追和波王多蒙特開3:3
天鵝今屆令人眼前一亮，連力爭3連冠嘅鹿島鹿角都唔係佢哋手腳，雖則佢哋冇乜星，但係3個巴西外援基頓、馬斯奧李察士同埋柏度祖尼亞都好搶鏡；加上國腳矢野貴章都有料到，要作客數不死鳥，真係唔係冇可能㗎，就冷敲佢哋開「客/客」同埋3:0波膽。同日大分三神主場對山形山神，山神雖則係升班馬，而且仲首次打日聯，但踢落一啲都唔失禮；特別係前鋒長谷川悠入到波，4場聯賽入2球，呢場對陣容不整兼狀態未起嘅三神，有力出冷，要「和/客」。
德國波方面，多蒙特係今季嘅和波王，26場居然和咗一半（13場），仲開過兩次3:3同1次4:4。而科隆實力唔算好差，前線嘅洛華高域有入波能力，聯賽已入14球，故今仗再追3:3。
文：青蛙仔