相信冇乜市民知道政府舊年開始搞「全港運動會」，畀18個區議會派代表競賽。呢個活動搞到無聲無氣，試問有幾多市民知道港運會原來到下月9號就正式作賽？唔少區議員提到港運會都唉聲嘆氣，覺得政府唔重視，各區亦都無謂嘥力宣傳，搵夠人參賽交數就算。
唔知係咪見市民反應異常冷淡，政府都特別喺嚟緊兩星期，舉辦三場精英運動員示範表演籃球、游泳同田徑，相信都係借勢谷吓港運會，有興趣嘅市民可以上康文署網站了解詳情。八方最想知道當日嘅表演，會唔會好似噚日由華人運動員協會舉辦嘅「第九屆全港兒童細運會」咁精采？全場最細嘅兩歲參賽者劉智仁同金祉瑩爭奪60米小飛人冠軍寶座，就得到唔少掌聲。