經濟環境疑似轉好非好，雖然未必要學嗰位中大「慳家」講師格言，一個幾毫都要慳，但以我認知，橫財從來不是因賭大，福至心靈已可，所以長買幾十蚊2串3波膽考眼光，係我喺海嘯中，認為最佳嘅投注策略。
足智彩食水深，尤其知大家鍾意賭熱門，每每比較外國莊家開低近5-10%；相反，賭冷門回報會稍好，所以點能夠像周中般瞓身賭曼聯贏波圖單W，馬後炮講又唔好分又冇話必贏，你話用作串過關加大槓桿效應仲可；但同當喺馬場賭大注位置（P），一樣係儍仔行為，所以我極反對好些馬評家，叫人哋買位置，風險高回報低。細個聽驃叔講馬，話當年馬王「祿怡」，喺有場賽事大熱跑第4，不知累得多少人走佬跳樓，賭場無必勝，小注怡情玩過關，過吓手癮便算。
迪加史卓普單W有計
吼冷門，今次提供兩隊榜尾分子，英冠查爾頓主場對氣勢極盛的伯明翰，個人認為主W可一試；對手上仗氣走狼隊，贏來有點騎呢，今次熱唔透，我同莊家有同一想法，不必博下盤及和波，因為1分已對查仔毫無作用，背水一戰，望佢哋爭得連捷。
另一隊荷甲榜末迪加史卓普，主場對中型班奈梅亨，迪軍近兩次主場先後贏荷華高斯及海倫芬，氣勢唔錯，今次再贏，有望擺脫包尾污名，對戰意一般的奈梅亨，W熱透有計。
文：蘋果波神