PetPet樂園：養蝦望爆殖

Hit爆日本的水晶蝦只尾指指甲般大，身價動輒過萬，未計各式各樣養蝦工具，未見官先打八十，無疑叫打工仔止步。心癢癢想試玩，可從入門級台灣水晶蝦入手，$1,000埋單齊景齊缸齊蝦，不怕你三分鐘熱度。說不定養得蝦仔肥肥白白，一產40粒卵「爆殖」，想停也停不了。

記者：蒙為亮
攝影：伍慶泉

極火蝦5隻$100

原產地台灣，入門級首選，全新紅卜卜兼繁殖力強，有人笑說似煮熟了的白灼蝦，側邊為黑黃相間的太空角螺。

彩虹鑽石蝦每隻$30

日本水晶蝦的鼻祖，頭有藍點，蝦身有灰白二色間紋，半透明橙色的尾部有四個小白點，Dave說香港尚有野生品種。

大和沼蝦每隻$8

來自日本的廉價淡水蝦，身體半透明，可望到整條腸臟，體形夠大行動快捷，通常作為試水蝦，初哥必買，非常易養。

蜜蜂蝦每隻$38

淡黃加上黑色的蝦殼，真的有點似蜜蜂的腹部，顏色雖稍遜紅白的水晶蝦，但尚算鮮艷，中等體積成群游弋。

粗黑間蜜蜂蝦每隻$40

原產中國，野生品種居多，通透呈偏橙色的火紅，愛捐窿捐罅，游水速度很快，經常跳躍。

水晶蝦每隻$180

體積細小，蝦身紅白二色，鮮艷奪目，中間有一條白間，像個「禁止進入」標誌，身價矜貴，玩家夢寐以求的「爆殖」品種。

■吸水濾槽依附大量微生物，水晶蝦最愛躲其中，避免把牠們吸走，宜在外包一層薄海綿。

水晶蝦源自香港

「講真玩蝦玩得專業過我嘅大有人在，講到玩平價水晶蝦，指導吓新手入門，我諗我都可以勝任嘅，」「ADA國際水草造型大獎得主」鄒維新（Dave）謙虛地說：「自己早幾年先開始玩水晶蝦，唔係因為人玩我又玩，只不過我玩開魚缸造景，造景世界有水晶蝦同燈魚點綴會靚好多，所以先學埋養蝦。」他的水族店，引入廉價台灣蝦和本地蝦，使一眾花不起大錢的初哥也可享養蝦之樂，「以前養水晶蝦強調品種，日本品種好正宗，顏色又靚，日本Yahoo都Bid到上萬蚊港紙；呢幾年台灣市場開始壯大，台灣人研究出好多新品種，價格平大截，$10至$100已經有交易。」
價格差天共地，兩者身價相差兩個零，台灣蝦易死一點嗎？「當然唔係啦，水晶蝦死亡最大原因係疏忽照顧。水溫方面，要經常Keep住25℃以下但又唔可以低過10℃，因為生蝦需要陰凉生存環境，蝦又有可能會跳缸乾死，所以水位唔可以太滿。」Dave大爆秘密：「水晶蝦唔係源自日本，前身其實係香港嘅彩虹鑽石蝦，日本人發現後帶返日本，經多年繁殖同演變改良品種，先有今時今日嘅水晶蝦。水晶蝦壽命約15個月，由小蝦到成蝦嘅成長期有4至6個月，每次可以生30至40個卵，約三星期之後就可以看見初生的水晶蝦BB出世。我從行山朋友得知，家香港仲有少數野生彩虹鑽石蝦，不過我唔會講地點，費事大家一窩蜂濫捕，保育好重要。」

■多看參考書可知更多水晶蝦情報，不過大前提是閣下要精通日文。

種莫絲好過水草

入門初哥請抄低以下要點！Dave：「放水入缸養水兩星期，加除氯劑、除硝酸鹽劑、放消化細菌水。水晶蝦食微生物，所以濾水器最好加生物環，加速益菌生長。兩星期後，保險啲，放平價試水蝦入缸試水，如果無太大異樣，才將貴價水晶蝦放入缸。」換水也有技巧，「每兩星期換四分一缸水，唔可以換太多，因為水晶蝦適應能力有限，定時檢查養缸水質酸鹼值，要Keep住喺PH5-PH6度。」
「水晶蝦經常換殼，要令蝦身色澤豐富，需要補充好多礦物質同鈣質，」Dave指：「各師各法啦，有朋友會倒適量鈣水入缸，我就會加天然造景石，因為石頭本身含天然礦物質同維生素，可以加強水嘅硬度，蝦換完嘅新殼先唔會太軟。」水草呢？「避免種要經常翻泥土嘅水草，因為泥土沉積硝酸鹽，對水晶蝦百害無一利。要種，應該種莫絲（Moss）仲要經常觀察水草情況，一見霉霉爛爛要即剪，否則霉菌會影響水質，令全缸水晶蝦報銷。」

■Dave（右）乃廣告人出身，不過迷上水族造景，他笑言：「家廣告只係副業，水族舖先係自己正職呀。」

魚蝦共處

日本人替水晶蝦分等級，由最便宜至最昂貴順序是B級、A級、S級、SS級和SSS級，魚蝦可共存嗎？Dave：「魚蝦共存有好處，不過大家要差唔多Size，魚缸如果無魚，水藻同水蛭會滋生，影響美觀。一缸蝦養得靚，分分鐘『爆殖』，到時可以放上網賣，或者分其他朋友仔。」「爆殖」是養蝦界術語，解繁殖眾多之意，「養水晶蝦養到可以散春生仔，真係好有成功感，水晶蝦本身已經有一定身份地位，養到可以送畀朋友喎，你話係唔係威先？」Dave笑笑口說：「雖然家蝦價同配套，相對比以前已經平咗，但要養得好依然係種學問，所以要多上討論區留言，不恥下問，多啲睇養水晶蝦嘅專書，方為上策。計落，我自己都好耐無試過『爆殖』，真係有啲難度㗎！」就是對「爆殖」這份執着，不到黃河心不死，令水晶蝦在香港越來越受歡迎，我的編輯與一眾同事，辦公桌上都有一缸二缸蝦呢。