自從喺雅虎開blog之後，好多市民都透過網誌留言，向前任政務司司長陳方安生盡訴心中情，其中好多人都特別提及家事問題。現為家庭主婦嘅阿Grace最近請教陳太，點樣先可以令到讀中五嘅囝囝無咁反叛，尤其囝囝最近識咗女朋友，最驚佢學業受影響。
阿Grace今次真係問啱人，事關陳太都湊大過一對寶貝仔女，感情由細到大都咁融洽，同仔女溝通對佢完全無難度。
請仔女拖友回家食飯
原來陳太對兒女拍拖態度開放；一旦發現佢哋有拖拍，為人父母嘅不妨請佢哋帶埋朋友仔返屋企食餐飯，同父母打吓牙骱吹吓水，大家相處似朋友，磨擦就自然少，咁樣比起逼佢哋偷偷摸摸拍拖好百倍。
至於做人父母嘅，其實都冇乜要求，最大心願咪多啲時間同啲子女一齊。現年69歲嘅陳太都話除咗經濟穩定，唔會憂柴憂米外，老人家最渴望嘅無非係得到仔女嘅愛同關懷，呼籲全天下所有兒女，無論係幾咁忙，都應該間唔中打電話畀父母傾兩嘴，或者返屋企食餐家常便飯，相信普天下父母已經非常心足。