家無Laughing哥睇！最In話題落咗喺秋官做嘅QSir身上，又倚天Q、屠龍Q，現代武俠喪溝士碌架！班鬼佬趁機撈埋一份，推出新一集世界盃桌球大賽；有StepByStep職業級訓練；就算無得同秋官較量，都可以上網搵「未來傅家俊」、「丁俊暉二世」呢班高手過兩招！
文：陳福榮
終極追求真實打法
體育遊戲都着重嘅玩家投入真實性方面，踢波Game以前求其㩒個掣就會勁射破網，家吓都會講角度、力水同隨機效果啦，而呢隻算係當今最有江湖地位嘅英式桌球遊戲《WSCReal2009》都無例外，比起以前嗰幾集更講求似足真人咁打波法。
不論對手係硬繃繃嘍囉電腦抑或真人，玩家都可經由新增設嘅「像真操作」方式嚟玩，比起以前Set死個位俾你打唔同，可以自行移位兼調節視點，甚至連預計路線都Check埋，務求揀個最合心水靚位先起Q。嫌麻煩嘅亦可揀番一直沿用嘅「經典」球道虛線操作，總之贏到比賽就係好方法。
職業賽最緊要淡定
初學者想領略職業生涯模式都唔難，設有指導課程及挑戰項目，讓玩家喺學曉不同技巧之餘，也能夠賺取技能分數幫自己升級。聽落好似有啲古怪，明明係打桌球又點會變成MMORPG咁款，原來其中一個關鍵正係抗壓能力，由於打波講求絕對集中，稍一不留神即會撻Q，而遊戲亦將呢一點寫埋落去，所以就算幾想即刻做職業球手，呢啲學師時間點都走唔甩。繼續操落去仲可以加強擊球力度、「落西」幅度甚至跳球等，到時肯定好波過QSir啦。
另一方面，本作品係由BBC全力支持，整場比賽都可聽到熟口熟面嘅評述，有時班友更會搞吓爛Gag，令沉穩正經嘅桌球賽事帶來丁點輕鬆氣氛。
網上挑機無難度
想更投入到職業生涯，要達成任務數量，來開啟約百名隱藏人物及比賽場地外，亦能選擇喺Knock-Around桌球吧玩小型枱波，甚至挑戰地位日漸提升的上海大師賽等，滿足各界桌球迷嘅願望。如果想同三五知己挑戰，Xbox360版可透過Live來找尋對手，反觀PS3就只能單對單咁同機離線對打，想搵英美高手一齊玩自然會揀前者嚟買啦。
今集還收錄咗世界盃英式桌球冠軍賽嘅2009年資料，而且唔單止「士碌架」就連美式8號波嘅錦標賽PoolChampionship都玩得到，仲有大量統計資料，相信點都唔會少得奧蘇利雲、亨特利甚至丁俊暉份啩，咁傅家俊又點呢？
Profile
遊戲：WSCReal2009
機種：PS3、Xbox360、PSP、PC
廠商：KochMedia/BladeInteractive
類型：SPT
人數：1-2人
