復活節係外遊好季節，唔少高官同議員已經鳥獸散，但工聯會理事長黃國健（KK）就心繫香港，喺呢幾日復活節都喺香港過，噚日仲喺工聯會主辦嘅大平賣活動同唔少師奶一齊瘋狂掃貨，戰利品主要都係幾盒十蚊雞左右嘅蛋卷，以及唔同種類嘅罐頭，只係用咗百零蚊，但就滿載而歸，佢不忘賣花讚花香，話嗰啲貨平到無人有，點會唔買手軟喎？
原來留港消費並唔係KK呢個復活假嘅第一志願，佢有諗住同太太近近哋去澳門玩番兩日充吓電，點知澳門唔少酒店都爆晒，想訂間房都訂唔到，既然係咁就無謂勉強，索性留番喺香港唔使四圍騰，最後仲執到平貨，總算塞翁失馬喇。