復活節一到，唔少高官好似保育大隊長唐唐、財爺鬍鬚曾、啱啱搞完教科書加價嘅孫公，同日日面對醫療事故纏繞嘅周一嶽，都趁機外遊唞吓氣。就連自稱每逢長假期都要留喺香港睇實、以防出事嘅李少光，亦忍唔住返咗大陸鬆一鬆。咁啱泰國呢幾日局勢不穩，會唔會又再出現緊急情況，搞到港府又要搵包機接載滯泰港人？咁嘅形勢仲放假，唔通李少光咁大膽，見過鬼都唔怕黑？
遊泰港人甚多
復活節有唔少港人都選擇去泰國度假，貪嗰度平平哋，但人算不如天算，泰國政局又動盪，反政府嘅紅衫軍示威者，由曼谷分散到舉行東盟會議嘅芭堤雅，佢哋噚日多次逼近會場，誓言要總理阿披實落台先至肯收科。泰國反對派過往都會出招堵塞、癱瘓交通甚至機場嚟逼政府就範，一旦今次又出呢招，喺泰國嘅港人想返港都咪話唔牙煙。
隨時坐車返港
舊年12月大批港人滯留泰國，大家眼光光睇住內地同澳門派飛機接走同胞，最後港府慢咗N拍、大家嘈到拆天先至決定包機，件事拖累成個特區政府民望大插水。明眼人都諗到，搞成咁係因為話事嘅保安局局長李少光去咗外訪，雖然有林D9署理佢嘅職位，但佢只係掛個名唔做嘢，真正做嘢嘅保安局常秘又話唔到事。有個咁甘嘅教訓，李少光依然冇有怕，趁復活節去咗潮州打高爾夫球。
李少光今次確係打緊大膽波。不過八方友好話，其實成個保安局一直密切睇實泰國局勢，仲會一日多次打電話報告畀打緊波嘅局長，所以就算有乜事都可以即時作出果斷決策喎，仲話就算要李少光返香港坐鎮，由潮州坐車返港都只係三個鐘頭，唔似得上次喺日本book得機位返嚟，隨時乜都發生晒。
除咗靠班手下，佢哋仲會聯絡泰國嘅中國大使館收料，知道雖然有大批人示威，但未演變成流血衝突，國際機場仍然正常運作，所以家未使慌住。保安局噚日少有咁發出兩次「旅遊忠告」，朝早5點、下晝5點各一次。睇嚟係要顯示，阿頭唔喺度揸fit都唔再倒瀉籮蟹。八方都係要提醒一句：局勢嘅嘢唔好淨係靠一個渠道，上次低估情況，好大原因係煲呔向嗰時嘅泰國總理頌猜收錯風，信晒就以為"everythingundercontrol"，點知總理都要起身走人。
mailto:[email protected]