俗語有云，置諸死地而後生，唔衰到貼地，係冇資格重生的。
就喺阿披實同他信的支持者爭餐死時，反正未燒到遊客區，愛曼谷如香港後花園的旅客仍魚貫湧向曼谷。特別係呢個一年一度極瘋極狂的潑水節加復活節之夜，潑呀潑呀，總之越潑越旺，冲走衰氣，新的曼谷，正在，漸漸變形啦。
記者、攝影：陳慧敏
鳴謝：AirAsia、HolidayInn
70歲重生老宅
「泰國的傳統民居，啲木都黑麻麻，彎位又多，我都好驚呀！」這間開業一個月的民宿，正是Tasma爺爺70年前的老居，自從她跟媽媽移民美國後就一直丟空20年。回國後，間屋爛到好似鬼屋咁，然而因在美國的十幾年裏，Tasma周遊列國愛上住民宿，回鄉後就想要把阿爺老居改做理想中的民宿開門接客。前院變後院，後門變大門，接上新開的一條公路，結果，無的士司機識去。當年爺爺睡的床、奶奶用的古董梳妝鏡，都仍在房裏，9間客房各有不同，今晚同老公揀間浪漫白雪雪套房，聽晚住老爺間古董梳妝鏡房，扮少爺少奶在露台數星星；後晚，不如叫埋班朋友來池邊套房，打開後門即刻衝落泳池開poolsideparty吖！
BaanPraNondBed&Breakfast
交通：BTSSuasok站步行約5分鐘
網頁： http://www.baanpranond.com
靚女潑水Tips
有見唔少女仔都參加4月的潑水節，Tasma奉勸女生緊記幾點：
1.有姿色者要着避彈衣，或者去GayBar玩算啦，因好多人乘機博懵！
2.有咁樣衰整咁樣衰，戴定眼鏡潛水鏡，長衫長褲越殘越娘越好。
3.近年唔准用泵氣槍，好多人改用水喉，想鬥射水，都係算罷啦。
4.最安全方法，躲在車裏，人們照潑你當洗車。
5.搵個金腰帶散打王陪住，咁就得你潑人，人哋又唔敢摸你。
皮膚像BB
無論幾夜都好，行家們午夜收工後必做的事，就是去Spa！TheSukhothaiHotel的Spa最近新增了PoolSideSpa，對住個泳池，以蓮花做原料。佛教裏，悉達多太子一出世，行的頭七步都長出蓮花，蓮，簡直是一切的源頭。泡完蓮花浴，皮膚好似新生baby咁滑，感覺重獲新生！
做完Spa，過隔壁ChocolateBuffet找ChocolateProfessorNamNguyen，只要看看你面色就知你要飲深沉的黑朱古力，還是甜到漏的白朱古力。入門口，先送你一壺自選熱茶，然後出現眼前的，是二十幾款甜品和二十幾碗不同濃度的朱古力。NamNguyen：「當我累時，我煮87%的朱古力喝，想同老婆sweetsweet時，就揀甜一點的38%食。女仔都係鍾意甜，我特調一杯給你啦！」然後將38%、56%橙香同幾款朱古力溝埋一齊，呷一啖，嘩，橙的香味甜到魂魄歸位，都係飲番杯87%平衡吓好。
TheSukhothai
交通：BTS到Saladaeng站，轉計程車約10分鐘
收費：蓮花Spa$400起；朱古力自助餐約$180
網頁： http://www.sukhothai.com/
偷食唔抹嘴
餓咗好耐的港人，不理再一回的曼谷抗議，繼續去曼谷過新年時，HolidayInn已趁早前淡季進行了更新計劃。無論是HolidayInn還是Intercontinental的客房、大堂都升級了，商務旅館的感覺減弱了，更着重空間感。但我最記得還是Intercontinental上星期才開業的ChocolateCafeBarChoc。法國來的朱古力大廚Laurent，一邊偷食朱古力一路趕製巨型復活蛋。他將一系列來自法國的名牌朱古力帶來泰國，要殺出一條生路。剛才說過泰國人還不是非常愛吃朱古力，所以這裏的朱古力也有獨特的綠茶、椰子、辣椒等泰式口味。
InterContinentalBangkok
地址：973PloenchitRoad,Bangkok
網頁： http://www.intercontinental.com
天使光環裏乾杯
重新開幕的ZEN，令本來多嘢賣但幾舊幾悶的CentralWorld重生，亦令周遭大場如SiamParagon拼命出賣「3000Baht減1000Baht」，其餘貨品折上折，同乜都減價的優惠戰，益了我們這班漁人。買到一袋二袋，抬頭見到個閃着七色的天使光圈，shopping心願圓了肚又餓，升仙去也吧。位處17樓的Zense，由EvasonHideawayResort設計師設計，格局夠young夠hip，層層樓級縱橫交錯，有啲一去無回頭，有啲引你上閣樓小吧桌，且同時食齊泰國、意大利、日本及印度菜式。望着夕陽的餐吧，亦很有情調呢。
ZENSE
地址：17/FZENWorld17,Phatumwan
交通：BTS至Chidlom或Siam站走約5分鐘
網頁： http://www.zensebangkok.com
提一提
泰國抗議持續，但身邊仲有大班朋友繼續泰國之旅。雖然今次抗議者話明唔再搞機場，但大家都係多留意市面情況，確保手機有漫遊同香港聯繫較好。
出門提一提
簽證：持BNO或特區護照均毋須簽證。查詢：25216481（泰國領事館）
機票：乘AirAsia從香港至曼谷，來回票價$1,520起。查詢： http://www.airasia.com（亞洲航空）
貨幣：1港元約兌4.57泰銖（文中價錢已折算港元）
電壓：220V，雙扁腳插座
下周
泰國曼谷天晴，22-29℃
