亞視前日就亞姐造馬風波開記者會，話經過獨立調查委員會調查後已經有結果，但亞視唔會公開，總之賽果係眾望所歸唔使重選。噚日亞視執行主席張永霖話要再向公眾道歉，佢澄清唔再重選係亞視嘅決定，獨立調查委員會只係提供調查報告，由於當中涉及好多複雜嘅技術性問題，亞視先至唔公開調查結果。