泛民早前闖關澳門，大部份人順利入境，一場橫掃港、澳，驚動北京嘅政治風波暫時平息。既然綠燈大開，八方聽聞白鴿黨又蠢蠢欲動，復辦澳門一日遊街坊團，鄭家富聯同兩個大埔區議員任啟邦、關永業，今個月底舉辦珠海澳門一天團，再次「闖關」。由於接近五一勞動節，澳門隨時有大遊行，時間咁敏感，因此好多人留意白鴿黨旅行團會唔會出問題。
鄭家富冇回鄉卡，所以唔會隨行，關永業則稱暫時未聽聞有任何風吹草動澳門方面會落閘，佢話已做好兩手準備，預先交代旅行社，如果佢同任啟邦去唔到澳門，街坊就「自由行」，佢哋幾個議員會迎接街坊歸來，總之一路順風，玩得開心啲。
短線團受街坊歡迎
咁鬼麻煩，點解仲要去澳門呢？關永業話因為呢種短線團價錢經濟，所以好受歡迎，唔使兩個禮拜，160個名額爆滿，佢哋見反應熱烈，下月初會添食搞多次。同類街坊團今年初已搞過一次，後來澳門發神經，惟有暫時唔搞，白鴿黨咁支持澳門旅遊業，鏵哥唔應該咁唔客氣啦。