陳冠希（Edison）啱啱喺新加坡宣傳完電影《神鎗手》，好多人以為佢已經返咗美國，原來佢秘密由上海飛咗去北京，噚日上晝11點半，見到Edison笑容滿面咁步出機場，身邊仲有兩個大隻保鑣跟身喎！
陳澤民唔知情
今次去北京，Edison主要為旗下時裝店同內地廠商傾合作，佢呢兩年都好努力經營時裝生意，希望有一日做到全國都有Clot時裝店，然後將公司發展成上市公司。呢兩年佢雖然喺美國生活，但成日都秘密返內地傾時裝生意，連佢老闆林建岳都讚佢好有生意頭腦。
不過，林建岳始終都擔心Edison嘅人身安全，所以吩咐公司上下唔好張揚佢嘅行蹤，仲要請貼身保鑣保護佢，而今次Edison去北京，事前連佢老竇陳澤民都完全唔知。馮仁昭噚日打電話畀陳澤民，佢話：「家我喺杭州傾嘢，真係唔知個仔到咗北京，等我了解吓！」後來佢同個仔通過電話，先肯定個仔去咗北京公幹。
此外，《神》片噚日喺東南亞上映，雖然內地唔上得齣戲，但國語版DVD就冇問題，今日會喺內地發行。寰亞公司高層莊澄噚日證實話：「部戲的確會喺內地發行DVD，但發行期幾時，我都要了解吓。」