現年30歲的姚嘉妮與43歲的林祖輝結婚兩年多，他們本月底便榮升媽咪爹哋。一直對腹中BB性別保密的姚嘉妮，原來所懷的是B女，日前她效法母親拍攝懷孕照，為人生重要時刻留下美好回憶的同時，也為B女留個紀念。姚嘉妮昨日說：「我影畀個女睇，大個女睇番啲相會好特別。」
臨盆在即的姚嘉妮，近日到好友影樓BananaBananaStudio拍攝了一輯有型有格的懷孕照，為人生重要時刻留個美好回憶。姚嘉妮昨日在電話接受記者訪問時說：「輯相係我第34、35周影嘅，家我第38周，預產期呢個月23號，但隨時生得。拍攝當日祖輝太忙，冇陪我一齊影，反而之前私人影嘅時候就有。幫我影呢輯相個攝影師係我朋友，咁啱佢老婆又有咗，預產期同我只差一日。」
祖輝入產房拍照
對於腹中BB性別，姚嘉妮一直相當口密，但昨日她與記者傾談時卻說漏嘴：「我影呢輯相係留畀個女睇，大個女睇番啲相會好特別，我媽咪陀我嗰陣都影過，自己大個睇番都好開心，而且我唔知自己會唔會再生，所以都想影番輯相留個美好回憶。」
談到即將出世的BB，姚嘉妮說：「我BB喺肚裏面大得好快，醫生話BB有啲超重，見到自己身形每日變，覺得興奮又自豪，呢種美態係懷孕嘅女人特有嘅，點可以唔影低作個紀念？我覺得呢輯相仲特別過輯結婚相㖭。」姚嘉妮表示老公林祖輝近日添置了攝影機、攝錄機和腳架，準備她入產房時拍照和拍DV。
採訪：何慧斯
