香港政壇後浪推前浪，由公民黨過檔民建聯嘅季霆剛，甫入黨就當選副發言人，各方人士都好注意呢位被網民稱為「新劉江華」嘅政壇新秀動向，唔少人話佢咁識走位，睇好佢遲早好似劉江華咁扶搖直上。
正所謂恨鐵不成鋼，公民黨人對季霆剛蟬過別枝亦十分肉緊，湯家驊喺自己個blog度話轉軚者對民主貢獻大極有限，離隊悉隨尊便，又呼籲民主派要做好思想教育，防止再有人「誤入歧途」，令民主派蒙羞。
季霆剛退黨後，批評公民黨熟悉財金嘅人唔多，湯大狀係呢方面發言人，被人明踩難怪咁火。民建聯財經事務發言人係陳鑑林，季霆剛跟住佢學嘢，行正好運。