東區醫院殮房唔見男嬰遺體醜聞，揭示管理殮房嘅人冇咗心肝好耐，技術員周國華被即炒，行政助理要降級，連負責殮房個病理部部門主管彭紹華都要接受院方「書面輔導」，指佢監督不力，八方聽聞佢今個月起唔做部門主管（COS），由血科醫生朱雲頂上整頓殮房。
知情者強調彭紹華並非因孭鑊而下來，佢舊年底已經放聲氣話唔想做COS，因為吃力不討好，除咗做臨床醫療工作，仲要兼做行政事務，而每月只係多少少津貼，加上今年1月殮房就爆大鑊，佢又冇興趣收拾爛攤子，院方遂批准佢申請，調番佢專注做臨床工作。朱雲唔係首次臨危受命，舊年屯門醫院發生輸錯血事件，朱雲獲委任加入專家小組進行調查。