天星失守、皇后駕崩後，香港人懷舊成狂，喺一片慕古氛圍之中，加上傳媒推波助瀾，快將拆卸重建嘅牛頭角下邨成為近期最潮景點，個個周末邨內塞爆無數龍友，男女老幼喺邨內擺甫士留影，屋邨係公眾地方，入去影相奈你唔何，不過肆無忌憚登堂入室，騷擾到居民就令人反感，搞到神憎鬼厭，牛頭角順嫂唔鬧鬼你班友就奇！
龍友擅闖民居影相
邨民對遊客湧至不勝其擾，群起向房屋署投訴，房署噚日發出新聞稿，呼籲市民去牛下影相要適可而止，事關邨內仲有約3,100伙人同160間商舖未搬走，邨外人當牛下係旅遊景點，好影響邨民日常生活。房署咁做好罕有，據稱係因為復活節假期將至，估計會有更多龍友入邨，所以先旨聲明，希望龍友尊重居民，唔好擅闖民居。
房署方面冇統計訪客數目，八方問過部份街坊，佢哋話邨外人嚟影相，確係有越嚟越離譜迹象，唔單止侵犯邨民私隱不斷影人哋相，甚至隨意入埋人哋間屋攞景。咁多人咁唔守規矩，八方建議邨民搵實Q睇場，好似門神咁趕走不速之客。
興記茶餐廳負責人恒哥話，知道有街坊不滿邨外人滋擾，佢話有啲龍友用閃光燈狂影相，真係會嚇親老人家，仲驚嚇過董太全副裝備駕到，而且條邨多咗大量陌生人，街坊都擔心影響治安。雖然邨外人搞搞震，但唔係冇幫襯，八方聽聞邨內食肆近月生意以雙位數增長，有啲舖頭仲要請兼職應付人潮！執笠在即，最後餘暉竟然咁燦爛，證明香港人唔知珍惜，曾經有條屋邨擺在面前，偏偏要等到拆樓先後悔，塵世間最痛苦嘅事，莫過於此，如果一定要加個清拆期限，一萬年夠未？
有邨民話畀八方聽，房署忽然勸止訪客可能同牛下要押後拆卸有關，佢哋聽聞由於供邨民調遷嘅新屋邨未能如期下月入伙，意味邨民可能要喺牛下住多幾個月，訪客不斷好唔方便，因此房署要喝止龍友越軌。房署發言人則話調遷時間表冇變，邨民最快本月底攞到新屋鎖匙，至於幾時拆牛下，暫時未有開工時間。
mailto:[email protected]