曼聯前鋒朗尼嘅老婆高蓮，周二終於親口承認有咗3個月，預產期今年10月。高蓮話陀住個肚都要搵銀，仲表示老公朗尼會係好老竇㖭，肚入面個B安樂晒啦！講到BB個名，揣測甚多，話唔定朗尼真係會改費爵爺個名：阿歷士（Alex）喎！
生仔叫Alex5倍大熱
高蓮宣佈懷孕當日，仲開心過見到名牌手袋，笑到口多合唔埋，「傳聞係堅料，我有咗！呢個消息同當年結婚一樣，係一生中最好嘅時刻。朗尼亦開心到飛起，我知道佢會係個好爹哋。（咁男定女呀？）我哋都唔清楚，性別唔重要，健康快樂咁成長就得啦！」
高蓮故作神秘，唔知係咪收咗博彩公司錢呢？皆因威廉希爾喺佢未承認有咗前，已為BB叫咩名開晒盤；男仔名大熱係5倍嘅阿歷士（Alex），擺明擦領隊費格遜鞋啦！女仔名大熱係Olivia得7倍，叫韋妮達（Waynetta、電視劇角色名）就有26倍；我求大俠覺得韋妮達個名好啲，因為同朗尼個名韋恩（Wayne）似呀嘛！
不論仔定女，亦不論叫咩名，高蓮肚入邊嘅肯定係金叵羅，賺錢能力爆燈；目前已經有傳媒出價500萬鎊（約5,680萬港元），買斷個BB嘅獨家報道權，包括100萬鎊嘅出生相，同埋出生真人騷等。不過，亦有人批評咁做係過份將BB商業化。
幫朗尼收斂臭脾氣
大家都知高蓮好識搵水，佢就講明大肚都要繼續賺錢㖭！唔知係咪見個B身價暴漲，身邊老友踢爆佢希望生多3、4個，唔通想變身搵錢家庭？不過，為人父親對老公朗尼肯定有幫助，尤其係學吓收斂暴躁脾氣；所以絕對係一B多得，唔係純粹搵錢咁簡單！
我求大俠啱啱做咗兩個幾月老竇，講嘢都細聲咗，又唔可以向化骨龍發爛渣，咩都要就晒佢；因為佢淨係食飽屙、屙完瞓、瞓醒食。超級球星朗尼到時實變阿四，脾氣唔好先奇啦！
高蓮B特別賠率
生仔，名叫Alex：5倍
生女，名叫Olivia：7倍
生女，名叫Waynetta：26倍
賠率來源：威廉希爾