支聯會主席華叔去美、加多個城市，傳揚要求平反六四訊息，當地時間星期二晚，華叔同支聯會副主席蔡耀昌亮相三藩市KTSF電視台現場直播phone-in節目《今夜有話要說》，華叔多年冇遠行，好多支持者渴望同佢見面、傾偈，電話線瞬間爆滿。
其中一個最特別來電者，原來係華叔30幾年前爭取教師加薪嘅老戰友，對方移民當地多年，想趁機同華叔話舊，可惜電話線爆滿，唔能夠同華叔傾偈，惟有留底聯絡方法日後詳談。當晚phone-in者唔少係愛黨人士，批評華叔去外國唱衰國家，又指香港人口不及上海，根本連做特區資格都冇，呢啲歪論當然通通俾華叔嚴正駁斥，唔使客氣。