煲呔「御用」智囊智經研究中心，日前大鑼大鼓發表將香港打造成教育樞紐嘅宏圖大計，建議政府提供多啲優惠，例如簡化入境措施，增建宿舍等配套安排，吸引更多內地學生嚟香港，唔少人認為呢個建議可以帶動香港經濟，政府亦裏應外合，表示會加以研究。
炒人冷飯當新嘢
但有政界中人指出，智經上述建議基本上係講咗N次嘅炒冷飯貨色，身兼民建聯成員嘅中產聯盟主席彭長緯，今年初去政府總部請願時，就已經提交過大同小異建議，然而建議石沉大海，估唔到智經翻炒後，即使冇特別加料，卻好似零舍馨香。
八方問彭長緯，佢話其實喺老董時代已提過類似意見，一直冇回音，所以佢先至再次上書煲呔，今次終於有反應，中央政策組兩位職員上月底忽然約見佢，名義係聽取中產人士意見，實際上卻係叫佢再講一次打造教育樞紐建議，令佢意想不到嘅係，事隔十幾日智經就推出差唔多嘅建議書，佢話不便評論中策組是否借花敬佛，笑笑口話可能英雄所見略同啦。