吳君如一向鍾意靚仔，她除了常常表現得對劉德華勁嗒糖外，原來對吳彥祖同樣着迷，在商台節目中吳君如自爆單拖踩入吳彥祖睡房，被其床上天花板金字塔形天窗所迷倒，並大讚他是媾女聖手，不過醒目的吳彥祖篤爆君如最後自己走，絕對冇下文。
吳君如前晚主持商台節目《嘩！嘩！嘩！打到嚟》訪問吳彥祖，靚仔自然有吸引力，吳君如一開咪便勁讚吳彥祖是靚仔媾女王，演戲和做生意一樣叻仔，令吳彥祖十分不好意思。
單拖上門冇下文
在節目中吳君如又自爆曾到訪過吳彥祖舊居，吳君如說：「我都上過Daniel屋企，佢屋企好正，間房張床對正天花板，係一個金字塔形天窗，真係媾死女。」吳彥祖可能為免被人誤會吳君如何故單拖到訪，所以為表無下文即回答說：「最後你都自己走咗啦！」君如笑說：「點解你講出嚟呀，等啲聽眾幻想吓。」
吳君如又問吳彥祖曾與不少女星合作過，可有心動過？吳彥祖說：「我同LisaS.已經6年，好似結咗婚咁，只係欠一張婚紙，我哋早已認定對方，一有BB就結婚，因為我哋係最夾，我同MaggieQ只係拍拖一年，大家未係好了解對方，我希望自己嘅伴侶了解同支持我。」
吳彥祖每事滙報
吳彥祖表示返家後不希望被女友問長問短，這樣會影響情緒。不過他自問識做，因為每次有緋聞或被拍到照片都會主動向LisaS.滙報，而女友也不大理會，只是不高興常被記者問及有關他的緋聞。對於早前有傳二人在5月2日結婚，吳彥祖稱他們也莫名其妙。
在節目中吳彥祖又表示不覺得自己是型男，更笑言初返港時有次在酒吧看見陳子聰、張耀揚及黃家諾三大型男，他們被不少女士包圍，而自己則站在廁所旁，這時令他十分羨慕又妒忌。後來他當上模特兒，才開始被女仔主動撩，更笑說原來自己的外表也有吸引力。
採訪：馬建華