前日講到中學嘅「中國文學科」危危乎，中學改為三三四制之後，選讀中國文學科者預料會買少見少，可能與英國文學科一樣，逐漸絕跡於中學。中學生不讀古文，他日入到大學，即使主修中文，自不然盡量避免選讀古典，主攻現代文學，長此以往，香港嘅大學畢業生之中，想搵到幾個儒學秀才，老莊專家，怕會好難。
賓架P請教授L吃午飯之時，與教授講起如何寫文章，如何公開演說而言之有物，談吐文雅，教授話：「恐怕都係要有番啲古文根底至得，中國現代政治人物之中，懂得演說，有如甘迺迪、奧巴馬咁叻嘅，好似未見過。」教授言之有理。你睇吓立法會議員之中，辯論時出口成文嘅，左丁山只聽過有兩位，就係張文光與黃毓民（黃議員唔講粗言之時），而呢兩位先生大人讀書之時，都曾對古典文章下過工夫。
不數日，教授L惠賜大作一本，就係《渾家．拙荊．夫人》，天地圖書出版，講到呢度，大家知道教授L就係劉紹銘教授啦，我哋小時候就睇佢嘅《吃馬鈴薯的日子》，知道佢中英文皆優，睇佢寫散文講中英語法之不同，係一種享受。劉教授在文集前言中講到歐化英化語句，談及董橋寫文，深信〈鍛句鍊字是禮貌〉，後來在一篇〈文字是董橋的顏色〉提及早年收到董橋來信，內有一句「白天應卯」，自己不懂，為之面紅一陣，要查辭典先至知道「應卯」之來龍去脈，後來與董橋通信，索性改用英文；董橋寫文，重視文字，劉教授引用董橋之言：「活了幾十年的人了，煙水池台，風景闌珊；荒村客路，斜陽無主……」嗱，各位看官，董橋散文係白話文，但如無古文根底，焉可如此操控文字自如？
正是因為現時好多專業人士通英文，不懂中國古文，所以劉教授在前言稱讚陳雲之《中文解毒──從混帳文字到通順中文》指出陳雲係一位銳不可當之新進「語言警察」，陳雲話新派語句講「不排除採取法律行動的可能性」，遠不如舊時師爺講：「或交有司法辦」，曾經有老友私底下質疑左丁山以廣東話寫專欄，我可以毫無保留地告訴他，我曾經針對性地以《古文評註》作為我的讀本達數年之久！呢本劉教授自選散文集就足以為左丁山嘅教本。