港股在萬五大關遇阻，卒之出現大幅調整，恒指昨天曾大跌652點，尾市反彈有力，但全日仍跌454點，收14474。滙控（005）新股出籠，沽壓大增，50元大關不保，低收48.35元，大跌2.85元，拖低恒指150多點。
恒指昨日最低14276點，在接近10日線（14224點）時便反彈，估計今次調整，在14000至14200水平會有強力支持，亦係一次低吸機會，整固完成後，大市可向15800的前高位進發，內房股早輪勁升，噚日回落之勢亦好急，可睇定再博一轉。
飛毛腿（1399）出閘脫腳，但前日急衝後，噚日唞一唞，仲健康，升破0.8元阻力，短炒可追進，博升3成。另一隻近期大強勢的御泰中彩控股（555），已連升3日，睇勢仲會急上。
御泰係轉型股，以前做金融業務，3年前轉型，現時主力大做內地福利彩票業務，成績已有目共睹。08年（12月結）上半年，集團營業額3.67億元，升87.8%，盈利1.34億元，大升7.1倍，每股盈利1.88仙，其中彩票業務營業額增長1.1倍至3.37億元，已佔集團總收入91.6%，經營溢利亦增長2.8倍至1.67億元。
悶聲發大財
御泰之即開型福利彩票業務已遍及全國主要城市，並積極擴大市場佔有率，去年9月開始，已與郵政局、加油站及連鎖超市組成聯盟開設銷售點，現時已超過2萬個，計劃在明年底前設立10萬個。
御泰經營福彩業務，頗為低調，公司消息不多，但即開型福彩業務發展快速，公司以收取銷售金額2%作為佣金，盈利亦水漲船高，屬於悶聲發大財之類。07年10月，御泰股價曾高見1.6元，昨日收0.345元，只得番21%，抵買到極。
08年全年，保守估計獲利3億元，升136%，每股盈利4仙。09年，福彩業務覆蓋面持續擴大，盈利可進一步提升，估計可再升66%至5億元，每股盈利6.7仙，預測PE5.2倍。
過去4個多月，御泰股價都只係在0.2至0.3元之間上落，嚴格來講係冇升過，今次破位而上，初步要到0.5元才會有較大阻力，以此價計，PE都只係7.5倍。
郭兆誠