隨着Laughing哥熱潮退去，網絡界一時間少咗個話題，無論傅穎嘅「全走音」、屯門普高嘅「無間道」，都未能填補網民心靈上嘅空虛。好彩最近有網友上載咗條01年9月無綫節目《都市閒情》嘅歌唱環節「鬥戲連唱鬥一番」片段，嗰位叫阿信嘅參賽者深情演繹林曉培首《娃娃愛天下》，片段上載YouTube一個禮拜，點擊次數已經衝破30萬，成為呢個月本地點擊No.1，有人仲喺Facebook設立「娃娃」群組，好多網民中晒「娃娃毒」，唔睇過真係瞓唔着。
俾江華勁寸
馮仁昭睇番條片，第一眼已經俾阿信個look迷住，金毛花花透視恤喇叭褲鬆糕鞋，典型MK全副裝備。之後見佢扭動皮包骨嘅軀體，糅合近乎拗柴嘅「moonwalk」同甩骱邊緣嘅單膊搖擺舞蹈，簡直技驚四座。阿信連揸咪都好有個性，好似揸緊酒杯咁，而當佢發現唱錯歌詞、走音加甩beat後，吐一吐條脷，都攞番少少同情分。不過擔任評判嘅江華畀評語時忍唔住寸阿信：「你知唔知你嘅問題係乜嘢？就係太有自信嘞。」
馮仁昭噚日打畀《都市閒情》監製趙麗萍，佢話對阿信冇乜印象，要睇番條片先記得，問佢對於娃娃效應有乜感覺，佢仲反問馮仁昭：「咁你睇完有乜感覺呢？」趙麗萍又話見到啲網民咁興奮，會考慮喺節目度重做呢個環節㖭！
