轆Book（數牌頭）：21歲揸林寶　夠大先過癮

轆Book（數牌頭）：
21歲揸林寶　夠大先過癮

林寶堅尼同法拉利，天生宿敵，鬥馬力、鬥身價、鬥Size，到今日仍然火併連連。但一般人總覺林寶比拉利更高不可攀，唔係講車價，而係呢頭蠻牛火氣實在太大，難以駕馭。搞娛樂嘅William，21歲仔就擁有人生首架大寶，「揸大寶先夠經典！」

記者：徐影龍
攝影：伍慶泉、梁細權
Model：Pantene@PureModels

夠膽改成甩尾車

今年24歲青靚白淨後生仔、含住金鎖匙出世、屋企十幾架頂級靚車，好難令人唔戴有色眼鏡睇佢，第一時間就將William歸類為二世祖，「呢架大寶Murcielago，係3年前幫老竇傾掂單大生意而獎勵我嘅，當時老竇問我鍾意咩車，我膽粗粗講林寶堅尼，咁啱有朋友放車，卒之用咗差唔多三百萬買架Murcielago。」當時你21歲咋喎？「係呀，林寶由細恨到大，正統鷗翼靚到連我魂魄都勾埋，馬力勁偈夠響，車身闊大夠霸氣，同家流行嘅細寶好唔同，大寶嗰種君臨天下嘅氣勢，始終先係最經典嘅。不過佢車身太矮好易刮底，所以平時都好少揸。」無估錯你啦，得個擺字，邊舞得掂吖，「揸咗一排，感覺真係好正，唔止外表因素，引擎同扭力都同幻想咗21年嘅感覺有好大分別。不過由於車身太龐大，入急彎唔係咁得心應手，最後俾我由四輪驅動改成尾驅，就番我玩開甩尾嘅底子，始終車應該配合人，唔係由人去就架車。」

■大寶Murcielago，朋友價三球有找，William再花20萬將佢變成尾轆車。

■車身巨難揸難泊，但內櫳相對較闊落，身邊乘客直接得益。

■今時今日仍堅持揸手波，呢啲咪男人嘅浪漫囉。

天生賽車狂

人哋廠方花咁多錢研究驅動系統，居然夠膽改成甩尾車？越傾越覺自己以貌取人相當膚淺，「我喺加拿大讀書時已玩開賽車，試過陪朋友落場砌，之後有個法國人居然邀請我加入車隊玩職業賽，老竇梗係唔畀啦，仲嗱嗱臨Call我返香港打理家族生意。手痕想飆車時咪上珠海玩囉，後尾識咗James、Wing等甩尾王，第一次參加佢哋嘅賽事就攞咗個亞軍喇。」原來咁有甩尾天份，咁架「尾轆」大寶咪揸得好得心應手？「真係越揸越順，我寧願甩尾都唔想推頭，Murcielago夠重夠橫，重心又低，入急彎時易Drift得嚟又易Handle，完全UnderControl，同樣揸大寶嘅朋友，入彎都無我咁順。
「相比下，細寶入彎當然靈活得多，唔係點會咁多人買吖。大寶就略為『掗拃』，我真係唔敢揸落旺角同人逼，但佢畀到我好強而有力嘅信賴，大寶喺我心目中，永遠都比法拉利高一級，雖然我揸架F360仲多啲……」

■殺聲震天係林寶招牌特色，行繞道時，真係由九龍灣到觀塘都聽到。

■外觀改裝唔多，最勁都係加裝碳纖尾翼。

■未夠廿歲被招攬做職業車手，近年已少砌車，但一樣喺大陸捧過盃。

周董、Aaron係Fans

周杰倫愛黑色神秘，生日收到阿媽送嘅限量版蝙蝠俠唔滿足，開口話要買林寶09最新蝙蝠車Reventon，齋車賣140萬美金，出牌打埋稅超過二千萬港元，周媽即時叫停唔批准，當然係愛子心切多過畀唔起啦。

■《珠光寶氣》高長勝揸住林寶、大拇指向下寸陳豪一幕都幾經典，雖然現實中林保怡未成為車主，但一樣有車行搵佢宣傳林寶。

■郭富城出名多超跑，家中林寶都有三架。曾被狗仔隊影到佢揸架AARON牌林寶落跑馬地，只為搵朋友飲嘢傾偈，相信佢屋企真係無乜代步車。

馬、牛唔妥有段古

話說當年FerruccioLamborghini搞開農業車輛，曾向拉利創辦人EnzoAnselmoFerrari投訴過F250GT波箱有缺點，居然被Ferrari寸番轉頭，叫佢返歸揸農業車！谷鬼氣下決意踩場鬥做SuperCar，而且堅持拉利有乜，林寶一定要勁過佢。雖然到今日，林寶已經歷過破產、被收購等命運，但精雕細琢嘅造工同堅持，仍可力保車壇神枱級超跑地位，有意無意間跟拉利繼續鬥落去。

■創辦人Lamborghini搞開農業車，爭啖氣而開發林寶堅尼。

■第一代林寶，量產型350GTVConcept當年已用上揭燈設計。

■代理話揸大細寶嘅比例幾近2:8，GallardoLP560更成熱門車款。

同戰鬥機鍊

Reventon為林寶最新千萬力作，全球限量僅20架，香港又叻一次，居然已有兩架搶先到港。暫時只傳玩具大王蔡志明送咗架畀個仔，另一架買主則係神秘富豪。Reventon以MurcielagoLP640為藍本設計，外表就參考F22戰鬥機，廠方仲鬼馬到搵架真正戰鬥機嚟鬥直路，結果當然係Reventon贏啦。