經典再現？Canon990IS玩拉爆

初代數碼相機之中，Nikon990絕對係一款經典型號，雖然已經成為唔少玩家收藏品，不過仍值得人懷念！唔知係咪見到990好意頭，Canon最新推出數碼相機亦以990做型號，不過就走大眾化路線，唔再賣高規格，改以趣味拍攝為賣點，當中最過癮必數單鏡相機絕招拉爆，990IS以機仔身份一樣做到，咁爆嘅990能否再創經典呢？

記者：許福合
攝影：譚盈傑

流線機形

見到990IS實機，不得不向Canon反映一下，有個靚仔機身，竟然都只出個銀身版，悶咗啲喎。好彩機身都有花心思，加上流線曲線設計，雖然唔算超薄，不過作為輕便型相機唔算大部，女仔揸機都好輕鬆。鏡頭提供到5倍光學變焦，相當於37-185mm，可惜廣角方面就比較弱，不過加強型4級光學防震都叫補番數，用家拍攝時無論係垂直或水平方向震動，都能透過鏡片移動抵銷，這點對拍攝相當實用，注重相片質素就要留意。另一值得一讚係機背所用3吋屏幕，試用時已發覺畫質相當好，查詢之下發現原來係使用與G10同級46萬像點解像度，Noise低同時顏色夠鮮，影花花草草效果更係一流。

■屏幕使用46萬點解像度，睇相特別清晰。

■動態顯示模式，向上或下揮動相機，就可以跳至上或下一張相片。

■想簡簡單單影相，轉到AUTO就不用煩惱。

■990IS係輕便型相機，重量亦只有160g。

變焦模糊曝光

時下數碼相機通常都附有多個拍攝模式，加入特別效果，但多數只屬軟件方式修改相片，好多人會諗「同自己用Photoshop改有咩分別？」，當初聽到990IS可以玩拉爆仲以為係軟件效果，但試用時就有驚喜，當轉用「變焦模糊曝光」後，按下快門會見到鏡頭自動變焦，雖然輕微，但與單鏡機扭動鏡頭變焦原理相同，可見並非軟件效果咁簡單，事實上使用上亦有限制，如不能手動變焦，自動變焦幅度亦唔算大，建議Canon加入用家自選變焦焦距，咁就更好玩，而效果方面，唔及單鏡機咁誇張，但亦能做到突出主體效果。另一個必玩功能係「創意光影效果」，即係星鏡，除星星外，仲可以選心形、音樂、蝴蝶等6種形狀，影夜景時就更好玩。

拉爆是甚麼?

拉爆其實係單鏡相機一種拍攝技巧，一般可使用較長曝光，如1/4至1/8秒，當按下快門後將鏡頭焦距由Wide轉Tele，或Tele轉Wide，就能拍攝到將面扯出來效果，相片會帶有矇矓動感，主要作用係突出主體，亦有唔少玩家愛好使用拉爆拍攝夜景，可以有光線四射效果。