上年中上市嘅澳博（880），首份年報噚日面世，賭王何鴻燊嘅執行董事袍金亦曝光，08年共收2430萬銀，比07年嘅2330萬銀，加咗4.3%即100萬銀。
雖然今年好多上市公司高層減咗人工，或者收少咗花紅，又雖然澳博上市後首份成績表唔多靚，純利倒退近五成，但澳博主席賭王依然袋袋平安，袍金有增冇減兼無人能及。至於行政總裁兼執董蘇樹輝，袍金430萬銀，只係賭王嘅零頭，不過都已經加咗80萬，加幅23%，已經好唔錯。四太梁安琪則攞210萬銀，包括170萬袍金同40萬薪酬及其他福利。
咁賭王喺信德（242）做執行董事袋幾多？由於08年報未出，所以未知，但睇番07年嗰陣，佢喺信德只係6.5萬銀，同澳博嗰份差天共地。