老友大麻成牛年犯太歲，食咗幾次牛肉乾都未夠黑，早排仲俾石仔打穿埋擋風玻璃，日本車仔照計整番都係有限數，不過呢個年頭慳得就慳，問我係咪有的士用開嗰啲平價貨。唉，其實好多人都有誤解，好似「的士胎」咁，以為係特別嘢，其實只係啲品質普通、得個平字嘅B貨，點會咁多的士專用嘢吖。聽大師傅阿坤哥講，換擋風玻璃連工包料只係千零蚊，若一味貪平，揀啲渣嘢係好危險，因為厚度通常唔平均，造成若隱若現嘅圈紋，睇落唔覺眼，但望耐咗就會頭暈，搵食車日對夜對，碰啱司機位多圈紋嘅就好易出事。我黃師傅當然唔會貪平，都係嗰句，條命點都唔止值幾百蚊喇。
文：黃師傅