上星期三《經濟學人》社論，創造新詞─Bossnapping，此字當然係從kidnapping衍生而來，kidnap就係綁票、綁架，翻查字典，kid係兒童，nap有搶、奪、偷之意，相信係從古代偷拐孩子而來。字典話kidnap一字首先出現於一六七八年，kidnappers就係偷運勞工到北美洲農田工作之人，換句話講，就係自非洲偷呃拐騙搶一啲黑人豬仔到北美洲做奴隸之狂徒，現代用法就係「搶」人質逼收贖款。點解有bossnapping呢，因為法國工人現今時興禁錮老闆，逼老闆取消裁員關廠命令，以老闆為人質，強逼公司與公司重新談判，《經濟學人》講workers"bossnapping"executivesinFrance，可能係黑色幽默，希望bossnapping唔會成為風尚啦。
法國係一個奇怪國家，給人印象係浪漫、創意十足，懂生活藝術與享受，文化程度高，但呢個印象只存在於電影與及歷史，好多老友去完巴黎，就話巴黎污糟，地鐵站內尿味逼人，地鐵經常誤班誤點，經濟上倚賴政府津貼，稅負特別重，係廠家嘅墓園、企業家嘅地獄，故此法國嘅失業率持續居高不下，久唔久就有大罷工、工人騷亂、農民倒牛奶落河、運輸工人堵塞公路等事，大概外國有錢人帶錢去法國享受就好好，有錢人想去法國賺錢，事倍功半，法國有錢人呢，就千方百計偷運現金去瑞士，去盧森堡，去列支登士敦，企圖盡量避稅、逃稅。
法國佬唔好好檢討自己，卻遷怒於甚麼「避稅天堂」，要在G20會議中，想話將香港澳門列入黑名單，好彩胡錦濤與薩爾科齊力撐，奧巴馬打圓場，香港先至得以免除名列黑名單之內。呢位薩爾科齊與兩任夫人各自精彩，各自偷歡，幾合乎法國傳統，但在經濟外交上，佢就變臉快過四川變臉大師，最初懶醒咁高調向達賴喇嘛示好，北京收回法國貨訂單之後，薩爾科齊就低聲下氣求見胡錦濤，到倫敦文華東方酒店拜會，事先就宣佈反對藏獨，以博歡心。法國人有文化？選出一位咁嘅總統，反映出法國亦係唯利是圖，見錢開眼之輩，與純資本主義，唔講文化之美國人冇乜分別。