陳爸爸跟太太最初只隨便用Email註冊名作Blog主名，為05年出世大女在恩寫日誌，但當中內容卻不隨便，在恩的身份由第一人稱到化成各種身份再到出書還未夠，更號召天下BB齊上鏡，最有意義是書本所有收益將捐贈兒童慈善用途，包括快將一周年的四川地震災區孤兒，向BB致敬。
記者：林佩婷
攝影：陳盛臣
不育疑慮
莫見在恩爸爸現有兩個囡囡咁幸福，其實他們曾陷不育疑惑。「99年結婚前做了身體檢查，一切正常，但一直未能懷孕。有次聽電台醫生講不育，心諗如果真係唔得嘅話就去收養小朋友，正當晚晚祈禱，大家係咁諗想行動嘅時候，太太終於有咗！」
屋企有個陳經理
在恩爸爸驚太太Isabel放產假無所事事亂諗嘢，就叫她寫Blog宣洩一下懷孕感受。到在恩出生，這個Blog順理成章繼續。初時他們寫得很正經，字裏行間都是書面語，但後來玩埋四格漫畫，還以囡囡作出發點來寫。「寫寫吓自然就會諗啲得意嘢，有時影幾張連拍相，好似四格漫畫，之後又諗到應該由主角在恩出發，於是改成第一人稱。」
兩夫婦越玩越大，還給在恩一個經理職銜！「有張相影到在恩有個雙下巴，喺我印象中經理都係肥肥哋、雙下巴，而且對父母嚟講仔女就係經理，我哋就係阿四，所以就以角色投入落去，仲將佢張床變身成Office，其他好似用衫夾夾住公仔或襪仔，就當成文件夾等，令個Blog更有趣味。」
BB大聯盟
網誌原本打算寫到囡囡滿月為止，誰知後來停不了手。「我哋要返工，又要湊女，返嚟又要影相寫Blog，真係辛苦過返工。但滿月後，發現親戚朋友一路睇緊，一停手就俾人催寫。跟住就諗寫到100日唔寫，之後又推到話1歲，最終由05年寫到家！」而且還萌生出書念頭。「有時會覺得網上嘢捉唔到，但書本可以揸喺手，真真正正有紀念價值。同其他親子書唔同，我呢本特登舉辦咗個BB聯盟，等其他BB都可以一齊出鏡，意思係想幸福父母都可以一齊分享喜悅。本身我哋唔係為咗賺錢，籌劃出書嗰陣剛好四川地震，所以將部份款項捐助孤兒，希望在恩幸福之餘，亦同人分享呢份幸福。」
