港大學生會社會科學學會今年社科節主題係六四二十周年，學會噚日搞咗個「不願置平、流連亡反」論壇，邀請程翔、卿姐等人同學生討論平反六四問題，現場火花四濺，連因應今年社科節主題出版嘅特刊《記不起，忘不悼》都幾有睇頭。
特刊簡介六四始末，仲有個六四知識小測驗，唔算深，但要答啱晒都唔易，而喺鳴謝一欄，八方發現咗醫學界議員梁家騮大名。騮哥係中大出品，同港大有乜關係呢？騮哥同八方講，早前獲學會來信要求捐款資助出特刊，佢覺得既然本特刊冇特定立場，學生研討吓六四、認識歷史值得支持，所以佢捐出1,000蚊。
「梗係有我自己嘅睇法」
不過騮哥坦言冇參加過支聯會六四燭光集會，「（對於六四事件）我梗係有我自己嘅睇法，但我唔係啲好積極爭取去做啲乜嘢嘅人，每個人眼前都有好重要嘅嘢去處理。」港大學生會就平反六四搞公投，有學生會高層話，內地生同本港學生近日喺民主牆大打筆戰，氣氛熾烈，估計有幾千人投票，結果難料。