「人嚟！豬頭鍘侍候！」國際米蘭教練摩連奴今次真係要包大人上身，將前鋒阿祖安奴大刑侍候喇！阿祖又真係唔抵爭，之前帶馬爾干嫖妓，又開毒品派對，今次為追番女友玩失蹤，搞到全世界以為佢被綁架，實在太唔似樣喇！
同變性人開P女友勁火
早幾日阿祖失蹤，傳媒以為佢被綁架，係就係綁架，不過係愛情綁架啫！上月底，阿祖喺屋企同羅賓奴以及變性人等開P，蒙在鼓裏嘅女友祖安娜即刻反面。結果上周中世盃外後，原定上周四返意大利嘅阿祖箍煲失敗，於是走去自細長大嘅貧民窟，同班豬朋狗友搞搞震，玩逃避現實咁話。
阿祖上周四至上周六「潛水」期間，連阿媽同經理人電話都唔聽，於是屋企人狂打電話畀祖安娜幫手，可惜都係冇用。到周日，阿祖先至蒲頭返屋企同阿媽一齊。其間巴西傳媒報道，阿祖喺貧民窟曾同大毒販開P麻醉自己，如果屬實佢今次真係幾傷，究竟佢女友係何方神聖呢？
摩連奴講明棄用
原來，祖安娜同樣出身貧窮，兩年前認識到舊年戀情曝光，巴西傳媒形容佢唔同其他球星女友，「唔重物質，阿祖想送錢、珍珠，都被佢拒絕。」照咁睇，右肋紋上"Adriano"紋身嘅祖安娜真係真心對阿祖喎。唔怪得，阿祖經理人連拿度暗示，一日追唔番祖安娜，一日都唔知佢幾時返意大利。
我求大俠明白阿祖一片癡心，不過作為27歲嘅男子漢，都好應該顧吓事業，玩失蹤咁冇職業道德，恨鐵不成鋼嘅祖安娜，又點肯返去你身邊？家連國米教練摩連奴都講到明，今季唔會再任用阿祖，睇嚟今夏都要搵定球會落班喇！或者返巴甲陪朗拿度咯！