真係世事無絕對，一把年紀都竟然有人吼，八方並非唔抵得幾位有新歡嘅議員曾鈺成、涂謹申同謝偉俊等人，而係講緊獲法國佬青睞嘅百年老店電車公司。九倉忽然宣佈法國公司入股電車，消息令人意外兼出奇，點解法國佬會對呢盤「小」生意有興趣呢？唔通貪叮叮行得慢似法國蝸牛，啱晒法國人他他條條、慢慢嗒嘅性格？
余若薇搭電車寫罰抄
作為香港現存歷史最悠久公共交通工具，電車陪伴無數香港人成長，公民黨余若薇話讀書時由細到大都係坐叮叮返學，因為車費夠平，佢喺電車上度過無數日子，但少女時代就冇試過搭電車拍拖，最記得係有次上堂傾偈俾老師罰抄書，佢唔想返到屋企先抄，恐防畀父母知道佢又受罰，就趁搭電車返屋企嘅時間，喺車上運筆如飛完成罰抄，所以佢笑言電車係佢頑皮事嘅見證。
工聯會議員王國興同電車嘅一段情浪漫得多。佢六十年代時家住尖沙嘴，青梅竹馬女朋友卻住筲箕灣，所以每個星期日拍拖，都要先坐小輪過海，再喺中環坐叮叮去會佳人，山長水遠去接女朋友拍拖，王國興當然追求成功啦。咁神心做港女觀音兵，八方相信王國興堪稱香港初代電車男。
車身唔畀泛民登廣告
另一個議員梁家傑家仍然係電車常客，佢成日要穿梭灣仔、中環同上環開會，揸車、搭港鐵都唔方便，叮叮就係短途往返最理想交通工具，佢愛坐上層，貪開揚又凉爽，「電車慢慢行，搭車時可以睇吓兩旁景色，心情都輕鬆啲。」對於法國公司入股電車，佢話希望政府除咗要留意票價，仲要嚴防新公司改變電車嘅本土特色，「電車可以話係香港文化遺產，一定要好好保育。」
住喺港島幾十年嘅民主黨甘乃威，由細到大遊咗無數次電車河，由上環坐到筲箕灣，玩足大半日都花費無幾。佢警告法國佬唔好隨便改革，「第一唔好加冷氣，老人家坐車怕凍，第二唔好加價，否則我一定去示威。」
以往選舉期間，電車經常拒絕民主派車身廣告，法國佬講明想做大陸生意，八方相信都唔會畀民主派上車。
mailto:[email protected]