究竟香港政府一年嘥咗幾多納稅人嘅錢？呢條問題相信好多港人都想知。
敏妮今日唔係想計畀你睇，香港政府究竟嘥咗幾多香港人嘅錢，而係想同大家分享吓香港政府有幾「關照」各位市民。
社署賠償條款寬鬆
唔知大家知唔知，單車都算係交通工具，而喺香港，道路使用者遇上交通意外，無論係咪你錯，只要你有損傷，都可以向社會福利署嘅交通意外傷亡援助計劃索償。
話說敏妮認識一個玩越野單車嘅朋友，某次佢去踩單車，喺山坡碌落嚟，整傷手腳，同佢一齊踩單車嘅朋友叫佢去社署索償。
起初佢都唔係好信，玩單車整親都有得賠？點知佢去睇醫生，嗰位醫生寫咗7日病假畀佢，朋友攞住張醫生紙去社署要求賠償。結果交通意外傷亡援助計劃賠番每日550蚊，7日合共3850蚊畀佢。
衍生其他社會問題
朋友話：「嗰幾日其實我公司都有繼續支人工畀我，但政府都賠錢。」當然socialinsurance喺一個文明社會非常重要，可以令弱勢社群有保障，敏妮今日講呢個話題，亦唔係探討香港社會保險嘅漏洞，衰啲講，敏妮只係提醒香港市民善用權利，另一方面，亦想大家諗吓，太容易得到賠償，會衍生出其他問題？
敏妮聽過一個經常往來中港做生意嘅朋友講，喺香港嘅交通保險，人命賠償金額係1億元，但喺大陸，交通保險人命賠償就絕對少於呢個數目。朋友話：「敏妮，大陸人多，命唔值錢。你唔係未聽過為咗攞賠償金，整盲隻眼都得，試諗諗一條命可以換到1億銀，會有乜情況。」
溫敏妮
http://wanmanli.com/blogs/