航運業仲要捱幾耐寒冬冇人知，但業內人士預咗今年都唔慌好得去邊，由前特首董建華家族揸弗嘅東方海外（316），舊年持續經營業務嘅盈利跌咗一半，身為主席嘅董伯伯胞弟董建成，舊年基本袍金同薪金冇乜點變，加埋有520萬港紙，但係酌情花紅就大減62.4%，至564.7萬港紙，計埋退休金供款，舊年人工1186萬蚊，少咗四成，總算向股東有啲交代。
之但係，董伯伯個仔董立新份董事人工反而仲加咗少少，合計有331萬銀，多咗14萬，對佢嚟講濕濕碎，但已經相等於一般打工仔全年人工。
東方海外人工加得最勁嘅，莫過於董事兼財務總裁金柏堅，08年攞人工435萬銀，比07年嘅131萬，翻咗3倍以上，不過，佢07年8月先身居要職，條數又唔可以咁計，所以睇埋今年份糧至算數。