噚日，華華去咗「歐元之父」蒙代爾同「博弈論之父」納什喺理大開嘅記者會，卡士咁勁梗要去八吓。
有人問納什，究竟GM應否申請破產令。佢老人家冇乜氣，不過好開心，用佢發明嘅博弈論分析工會、政府、GM等會點。
之後有人問蒙代爾歐央行會否用量化寬鬆政策，佢隨便耍咗兩句，就好似維園阿伯上身咁，搶咗納什嘅問題嚟答，大鬧GM人工太高，應該破產咁話喎！
不過人工一路都高，點解家至爆？佢話：「因美政府唔睇滙率，畀美元08年突然升三成所致。」
蒙代爾真係勁，問乜都係番去佢呢個標準答案。雷曼爆破？亦因美金升。金融海嘯？都係。
記得華華今年2月時去過蒙代爾講金融海嘯原因嘅論壇，佢亦都係話主因美國官員冇理美元升值。重複又重複，乜都賴晒美元升，有少少維園阿伯鬧人咁，千篇一律。
蒙代爾唯一唔用王牌答案嘅問題，就係中國能否「保八」？佢話唔得，不過應能「保七」。