港式奶茶滋味獨特，溝埋咖啡飲嘅鴛鴦，八方認為堪稱香港中西文化融合嘅精粹，民政局常秘尤曾家麗原來都係鴛鴦之友，正在首爾訪問嘅肥尤，挑選咗幾幅中大藝術系、浸大視覺藝術學院同展能藝術會創藝自強計劃註冊藝術家嘅作品，作為送畀韓國政府及機構嘅禮物。
其中一幅題為《鴛鴦》嘅作品，由浸大視覺藝術學院學生陳靖豐創作，最特別係以真嘅咖啡同奶茶代替墨汁，分別整出「混咖啡」及「溝奶茶」幾個字。據講呢件藝術品，係想探討中國視覺藝術唔一定局限於傳統，亦可以同日常生活息息相關，就好似飲奶茶、咖啡或鴛鴦咁平常。鴛鴦衝出香港去到首爾，唔知肥尤有冇介紹韓國人嚟香港幫襯茶餐廳？