緋聞同志露械　無言以對
馮仁昭四圍超：林保怡聞彭冠期走夾唔唞 - 馮仁昭

無綫劇集《掌上明珠》噚日喺電視城開鏡拜神，除咗主角之一嘅陶大宇因病缺席之外，其他演員好似林保怡、宣萱、商天娥同埋滕麗名都有出席，幾位女演員仲齊齊戴住近千萬嘅珠寶首飾見人添！不過為免咁名貴嘅珠寶有所差池，所以佢哋切完燒豬後，即刻有工作人員同佢哋講，記得除咗戒指先至好食燒豬。

急入錄影廠

曾經同林保怡傳斷背情嘅彭冠期，最近喺一部同志電影《永久居留》入面，有一幕幫男主角Sean做替身露何B仔嘅鏡頭，於是乎噚日諗住問林保怡點睇呢件事，點知保怡一聽到彭冠期呢個名之後，就話：「Noquestion！Noanswer！」跟住仲即刻轉身走入錄影廠，不過佢有咁嘅反應都好正常，成日俾人咁樣問，即係變相幫人宣傳？

娥姐買戒指

向來以豪氣見稱嘅娥姐，噚日佢戴住一set黑珍珠首飾嘅時候，佢就對嗰隻戒指愛不釋手，仲打聽到隻戒指價錢唔過10萬，娥姐跟住好豪氣話如果有半價即刻開支票，點知有贊助商嘅職員聽到後，好識做咁話冇問題，所以娥姐就好順利咁買到心頭好。
事後娥姐仲話一向都鍾意買首飾，今次喺戲入面都有出私伙，而且仲因為佢係珠寶店嘅董事長，有時候見到啲珠寶都會心郁郁。娥姐仲話睇中咗宣萱戴住條鑽石鏈，但係始終戴戒指嘅機會會多啲。反而宣萱見到珠寶嘅表現就比較冷靜，佢就話自己家比較鍾意車多啲，雖然珠寶比較保值，不過都係有贊助戴過就算，或者到年紀大啲先會轉口味。