經濟唔好，唔少人使錢都要諗過度過，慳得就慳。稻香（573）主席鍾偉平一定深明無論經濟好壞，人依然要食嘢呢個道理，所以幾年前已推出「一蚊雞計劃」，成功吸納一班捧場客。面對金融海嘯，佢地喺2月再度推出呢個優惠，噚日華華見到稻香CEO梁耀進，問佢個優惠成效如何，佢話人客反應非常好，平均1日可以賣7000隻「一蚊雞」，假期仲賣到8000至9000隻。
呢個優惠暫時只會做到本月底，而今次「一蚊雞計劃」計劃嘅成本，梁耀進話要2000萬，當中包括食材、宣傳同廣告費，咁計番條數咪分分鐘要蝕？佢話的確有唔少客都會因為「一蚊雞」嚟幫襯，但佢哋心目中都有個消費額，好少話真係齋食隻「一蚊雞」就埋單走人。