公民黨陳淑莊呢兩年驛馬星動，早前去完日本考察後，近日又去澳洲參加一個國際性青年領袖計劃，同世界各地20位青年領袖，及澳洲新晉政治人物交流，作為香港唯一代表，佢話真係受寵若驚。
據講澳洲政府喺Tanya未當選立法會議員前，已經邀請佢參加呢次活動，唔知係咪因為佢算係本地近年比較受注目政壇新人，所以獲外國睇起。Tanya本月1號啟程去澳洲，家身在悉尼，佢話今次想多了解當地保育、城規同文化藝術政策措施，希望香港政府可以取長補短。而當地政府方面安排同屬好戲之人嘅Tanya參觀雪梨歌劇院兼睇咗齣喜劇，Tanya話開心到瞓唔着。