一蚊雞、十蚊飯充斥市面，平是平，好食嗎？一味靠平，也沒有閒工夫去用心煮，失去了食物的原味。幸好在舊區土瓜灣，還有不少用心製作的食店，街坊價抵食夾大件之餘，都是真材實料。來，趁地鐵還未動工，地產商還未大舉進駐，是時候去一趟土瓜灣！
記者︰吳允冲
攝影：林栢鈞、伍慶泉、陳陶鈞
模特兒：RyanChow、IvanTsang@PureModels
童年味道！糯米磨粉做糕
十蚊三個的缽仔糕做法簡單，卻沒有人像信興隆有心機。林小姐依足父親的做法，不用現成糯米粉，每朝大清早將一粒粒糯米磨成粉，令缽仔糕的米香味得以保存，加上清甜的蔗糖，味道樸實。就連紅豆都是以天津紅豆煲三個鐘至起沙，舌頭輕輕一掂已變成茸。微暖的缽仔糕入口煙韌，有蔗糖香有米香，不像加入魚膠粉的街邊貨，質感像塑膠，紅豆還是原粒硬繃繃。
信興隆是三十多年老字號，女兒接手後搬往馬頭圍道現址，除招牌缽仔糕還有不少新糕品，像「固體紅豆沙」紅豆糕、西米糕都很受歡迎。茶果、糯米糍、西米糕有多款餡料：紅豆、綠豆、黃心番薯、紫心番薯、椰絲，真材實料，少甜而突出食材原味，當中以紫心番薯最得歡心，粉紫的番薯顏色天然，入口軟糯香甜，坊間少見。
缽仔糕$10/3件
入口煙韌，有蔗糖香又有米香，是小時候嚐過的味道。
原味糕點$10/3件茶果
入口有淡淡米香，外皮煙韌軟熟，不黐牙，不會似嚼香口膠。
西米糕
外表晶瑩剔透，夏天好多人買來雪凍食，西米皮彈牙非常，像在齒間彈跳一樣，好過癮。
紅豆糕
紅豆煲至起沙，豆味突出又不太甜，入口像固體紅豆沙，紅豆沙慢慢在舌尖上融化，消暑極品。
信興隆（23561211）
土瓜灣馬頭圍道182號F地下
十蚊即拉腸粉王
由經驗點心師傅開的香港腸粉皇，招牌作是布拉腸粉。腸粉要爽滑，最重要是開粉漿時「入油」控制得好。腸粉全部即叫即拉，見師傅倒米漿、蒸腸粉皮、放餡料、再將腸炒捲好，過程不過兩分鐘，包保上枱時還冒着煙，蘸點用幾種葱及生抽老抽煮的甜豉油更好味。十款餡料以傳統的牛肉腸、叉燒腸最好賣，貪新鮮可試皮蛋瘦肉腸、翠瓜雜菇腸。
秘製臘味蘿蔔糕$7
一大磚的蒸蘿蔔糕混有粗條蘿蔔，蘿蔔的份量比酒樓多一倍，抵食！
布拉腸粉各$10
平日用來煲粥的皮蛋瘦肉（左）、芫荽鯇魚（中）都變成腸粉餡料；葱花蛋蝦米腸（右）特別加入雞蛋，味道多了層次。
香港腸粉皇（27111115）
土瓜灣譚公道98號兆豐閣地下1號舖
大堆頭懷舊扒房
每個舊區都有她的平民扒房，深水埗有金鳳，灣仔有波士頓，土瓜灣代表是哥登堡。店舖裝修廿年不變，只略經翻新，那些卡位梳化好懷舊。舊式餐廳的牛扒難免稍經醃製，這裏可貴在牛扒不會被鬆肉粉醃到像棉花，還保留了牛扒的咬口和一點肉味，淋上濃濃黑椒汁，冒着煙的鐵板風味十足。街坊多為了自選晚餐而來，餐湯、頭盤、主菜（五選二！）、雪糕再加紅豆冰，都只是$50！難怪周末門外總見長長人龍，等一個鐘是閒事。
鐵板牛扒$65
新西蘭牛扒足有8安士，煎得焦香，波浪薯條居然久放都不腍，有驚喜喎！
晚餐$50（主菜）雞扒拼炸石斑
新鮮炸的魚柳可配雞、豬或牛，一個餐可選兩款扒，啱晒食肉獸。
肉醬意粉$51
肉醬以番茄加牛肉製成，入口有鮮茄味，不會一味得茄汁甜味。好多學生鍾意食。
頭盤香草牛油焗田螺平日單點都幾十蚊，這裏$50的晚餐已包埋。
哥登堡（27151639）
土瓜灣馬頭圍道440號地下
街邊價深圳風味串燒
美景街短短一條小街就有幾間平民食店，奇貌不揚卻有內涵。開業只四個月的燒閒站，就以深圳風味的串燒搶灘，價錢是街邊串燒價，像串燒丸、牛肉、雞翼全都$10串。深圳街頭風味串燒厚切牛舌、雞翼撒上惹味孜然粉，亦有日式鹽燒、汁燒及泰式鹽焗烏頭，好多花款。貴價的燒原條大鯖魚、燒安格斯牛肉，都是幾十蚊，菜心（$8）、豆卜（$6）、午餐肉（$10）都有，總之乜都燒得。
鹽堆石灘烏頭$68
新界烏頭肚內塞滿香茅及泰式香料，堆滿粗鹽後焗，魚肉帶香茅清香。
川辣水煮牛肉$78
重慶麻辣汁，加上鮮牛肉，離遠已聞到麻辣香，川味十足。
火焰燒蠔拼盤$72
燒美國蠔有鹽燒、火辣、日式、wasabi、蒜茸五種味。
燒閒站（27299993）
土瓜灣美景街45號
黎天王家鄉手作餃子
地道北京人主理的巧興，位置隔涉，卻是土瓜灣的寶藏，除了街坊，仲有不少北方鄉里粉絲專程來搵食，黎天王都是其一。店內有排骨麪、冷麪等麪食及素鵝等小食，主角當然是每日新鮮包的餃子，四款餃子包括韭菜、牛肉、三鮮、白菜冬菇。餃子皮只有2mm厚，可放湯或煎成金黃色，北京人地道食法是不放湯，加兩滴自製臘八醋，用荔枝醋浸原粒蒜頭而成，可減膩滯。
北京煎餃（韭菜）$18/10隻
外皮香脆而不失煙韌，咬落「咔嚓」一聲，湯汁瞬即噴出，韭菜鮮嫩無渣，無從挑剔，滿分！
三鮮餃$21/10隻
餡料有蝦肉、蛋、瘦肉和韭黃，咬下有一泡新鮮肉汁。
巧興（23349137）
土瓜灣安徽街7號嘉信大廈地下
街坊加餸平價小菜
「阿妹」十多年前在秀茂坪開鐵皮檔起家，後來搬到土瓜灣。店子以住家味道的招牌切雞和平價家鄉小菜吸引街坊，就算不堂食，買返屋企加餸都抵。下晝來吃碗$13的炸肉米線，還有酸梅湯或豆漿送，平到無話可說。
招牌切雞$35
好食在以豬骨湯浸熟，雖是冰鮮雞，但皮爽肉惹味，沒半點脂肪。
脆香炸肉$25
五花腩製成潮式白切肉後炸香，鹹香又爽口。
阿妹小館（27684673）
土瓜灣北帝街99號D地下