香港政府唔識寶又一例證。九龍皇帝曾灶財「駕崩」年幾啫，佢喺港九街頭嘅墨寶已經冇晒咁滯，政府聲稱會保留呢啲「龍墨」，但嚟嚟去去都只有兩幅加上保護裝置。噚日喺蘇富比嘅春季拍賣會，九龍皇帝嘅「龍墨」就以21.25萬港元成交，比底價高七倍。呢件名為《書法》嘅作品，結合左手邊嘅曾灶財04年親自創作書法，以及右手邊一幅皇帝1997年喺獅子山下塗鴉嘅照片，呢張相係藝術家劉健威影嘅，曾經喺威尼斯雙年展展出。
蘇富比發言人話，現場及電話競投好熱烈，但唔可以透露作品由邊個拎出嚟，或者由乜嘢人投到。蘇富比之前都曾經拍賣九龍皇帝一幅水墨木板書法，最後由一位土生土長香港人以5.5萬港元投得。