一場金融海嘯令好多「好科學」嘅傳統投資理論失靈，原來好多電腦統計模型，準確度同擲公字差唔多，於是另類投資理論變得多咗人留意。華華噚日喺《香港討論區》，見到有人話用卜卦算到農曆3月港股有股災，吸引好多網民討論，截至華華截稿前，總共有38頁留言。
仲有三個禮拜揭盅
寫呢個題目嘅網民hkft話，只要用特區政府97年7月1日成立嘅農曆時間，運用宋代邵康節所傳嘅梅花易數起卦，再運用六爻法解卦，得出本卦係「澤火革」，變卦係「雷火豐」。經過該網民推斷，「農曆3月港股將最凶險」，係「股災危險期」。
至於信唔信呢位網民所講，網上意見分歧。不過根據華華枱頭月曆，西曆4月24日就係農曆3月最後一日，究竟農曆3月港股有冇股災，仲有大約三個禮拜就知道。