民建聯日前舉行副發言人演講會，獲高層點名大讚嘅未來副主席張國鈞自然係焦點，但同場另一位後生仔都值得注意。25歲嘅季霆剛查實係公民黨前黨員，又係香港畫家聯會名譽會長羅拔嘅外孫，06年公民黨灣仔黨部開張時門口掛嘅對聯，就係佢嘅傑作。
咁點解佢又要由公民黨轉投民建聯呢？有公民黨中人估計，可能同個黨早前唔畀季氏選區議會有關。但季霆剛強調，公民黨熟悉財金嘅人唔多，令愛好分析財經大勢嘅佢有啲心灰；實際啲講係民記同內地關係好，建議變成政策嘅機會大好多，因此令佢心郁。有民記中人話佢係主動敲門，季氏堅稱經曾鈺成推薦。至於可唔可以做劉江華第二，就睇佢自己造化喇。