早幾日趁「紅日」揸車去探個回港探親好友，行經大埔道時俾尾隨部陳年大皇冠係咁啄住行兼閃燈。唔係啩，唔識字都曉睇圖啦，見到個牌都知係連續彎路，路速限制仲要係每小時50公里，大姨媽我手車都唔係流，部車更加唔流，莫非部陳年大皇冠勁過我部B字頭辣跑咁好笑？話晒安全守法要緊，就算係我部辣跑，都係行緊時速50公里，望一望後鏡，原來係個廿零歲後生仔，年輕人就係好勝心強耐性不足，之不過唔係話有膽就可以亂來，明知故犯真係叻唔切咩！仲記得年初喺呢個連續彎路段先至發生過單造成傷亡嘅意外，點解大家唔引以為鑑？雖然我最後都係駛入避車處放佢飆走，但坦白講，呢類雙線單程路面，仲要係連連彎路，技術再好都要守規矩，免得犯法兼累己害人！
文：大姨媽