大市升勢未完，但調整隨時會出現，整固後可再上，初步上升目標係15800點。
恒指噚日又再大升，報高452點，逼近15000點大關。期指就過咗，尾段有大手扯吸，高收15030，大升510點，H指亦有229點進賬。
內房股在高位個別發展，雅居樂（3383）、富力地產（2777）同中國地產（1838）等繼續造好，瑞安房地產（272）、上置集團（1207）同中渝置地（1224）就調整，其中以瑞房調幅較大，曾升見3.57元高價後掉頭急挫，低收3.18元，跌0.23元，跌幅6.7%，呢隻係近期升得最勁嘅內房股，急回亦好正常。內房在首季銷售以倍計大增，回一回都要買。
興達國際（1899）圓底收集完成，在1元水平再整固幾日，噚日卒之破位而上，高收1.10元，升10仙，升幅10%，成交更大增到1500多萬股，今次突破1.05元阻力，短期量度上升目標1.30元。明日派成績表，相信唔會令人失望，若業績對辦同展望有「揸拿」，中線仍可看好。
今年盈利將大增
大成生化（809）亦係一隻未曾大郁過嘅股票，噚日卒之發難，搶上1.17元高收，大升13仙，升幅12.5%，成交2700多萬股，係3個月來最「墟冚」一日，動力好強，可追入。
大成圓底收集成兩個月，近一個禮拜造埋支「右柄」就發力，升破1.10元高位阻力，照度上去，初步上升目標係1.47元。大成股價已「篤」穿保歷加通道上阻力，而20日線（0.962元）好快會升穿50日線（0.982元），確認上升大浪開展。
大成同阜豐集團（546）都係從事玉米生化產品製造業務，份屬同行，阜豐08年（12月年結）業績已宣佈，盈利大增5.5倍至2.94億元，股價則在個多月來由0.60元升上1.27元，升咗一倍有多，而大成則在1元水平上落，可以話未郁過。
大成08年上半年營業額48.5億元，升77.4%，獲利6.02億元，升61.7%，下半年保守啲，估計賺4億元，全年盈利都有10億元，每股盈利42.6仙，以5倍PE計，股價已可見2字頭。仲有一項有利因素，就係大成仲生產多元醇，係鐵路路軌墊塊嘅主要材料，今年盈利會大升。
郭兆誠