李澤楷私有化電盈（008）成功向前再跨出一大步，高院判決電盈私有化得直，當然有好多小股東好㷫，但亦都有人好開心，華華講嘅梗唔止小小超啦，仲有邊個？
華華諗，公益金應該會獲益不淺，點解？因為私有化後嘅電盈，會向港交所（388）交還8號仔呢個咁好意頭嘅上市編號，究竟呢個靚冧巴下一個主人係邊個？家吓新上市公司要指定上市編號，須向公益金捐出100萬銀，相信8號仔唔止值咁少。
噚日《香港討論區》已經有網友留言，估邊家公司會爭8號仔冧巴。克金舍民連估，「非中資公司莫屬，一定唔會係本地或外資。」
ultimatefighter猜係上海證券交易所，但華華點睇都冇乜可能，家陣講緊滬港之爭，上交所點會嚟港交所上市。三眼仔2008就話：「雖然電盈搞到8號仔個名咁臭，但站喺中國傳統上個冧巴咁靚，一定大把人要!」