廣州二月經歷全年的春夏秋冬，澳洲200條鯨魚擱淺，出現香港水域的座頭鯨迷路不能隨隊回北冰洋，溫室效應、水位上漲、海洋溫度劇變……十年間，「污染」由一個看似遙不可及的教科書名詞，變為觸手可及的切身問題，旅遊節目《豪遊天下》臨時刪走吃鯨魚片段有用嗎？有用的，做了，總好過不做，因為日子真的近了，明日之後，我們不知還有多少個明日。
記者：蒙為亮
攝影：譚盈傑
盧冠廷
暱稱盧Lo，有環保鬥士之稱，自小有讀寫障礙卻有作曲天份，《愛是這樣甜》、《陪着你走》等都是家傳戶曉之作，曾在紅館開《2050》演唱會，現全身投入環保工作，開設「綠色生活專門店」。
張韻琪
暱稱小辣椒，香港大學畢業後，赴英國倫敦經濟及政治學院修讀發展研究碩士課程，現定期為《明報》及《AM730》撰文，並加入綠色和平任項目主任，負責策劃與開展氣候變化的項目。
盧冠廷=盧
張韻琪=張
記者=記
水浸地鐵站
一條座頭鯨令我想起環保，談環保，令我想起兩個人，一是激情環保鬥士盧冠廷，二是現任綠色和平項目主任張韻琪，二人言行激進，為的都是愛地球吧。盧Lo說過：「要環保，我知難，但係都要做。」知易行難，但都要做，因為環保問題確實逼近眉邊，不止水浸眼眉，已經水浸地鐵站。
盧：如果仲係自己顧自己，唔環保唔愛地球，我諗過多幾年，好多動物會集體死亡，氣候暖化問題無改善，水位會繼續高速上漲，到時香港部份地鐵站會水浸。我唔係開玩笑，有數據可以翻查，照現時水位上升趨勢，如果繼續按比例持續增長，5年內肯定會發生呢個悲凉情況。
張：部份太平洋島國已經頂唔順，尤其係馬爾代夫，當地難民需要其他國家接收，新西蘭原先話接收10萬人，但好似都接收唔晒，呢個係破壞環境導致無家可歸嘅活生生例子。香港人身在福中不知福，火未燒到埋身，唔代表火勢唔嚴重。話你知，海水比上年已經上升咗3呎，夏天一到肯定又暴雨成災，上環、西環、新界北一定水浸，可能有一日，大家真係會攬住浸死都未定。
盧：我哋浸死，有啲人就會渴死，聽過黃河源頭沙漠化未？好哋哋一條大河，無端端點會乾涸？如果情況再嚴重落去，中國大部份農作物將會失收，經濟受重大損失，人命毫無保障。
記：我哋應該點做？熄燈一小時有無用？
張：呢個世代，政府唔做嘢，京都條約（1979年聯合國在日本京都召開的國際氣候大會，各國至今尚未作出任何溫室氣體排放量的承諾！）又形同虛設，我們暫時可以做嘅係做好自己，從生活小處着手，所以熄燈一小時應該支持。其實講環保，香港仲落後過大陸，大陸啲酒店幾乎裝晒自動熄燈系統，有人行過先會開燈，香港啲酒店，幾乎24小時開燈。
盧：後知後覺好過不知不覺，3月28號熄燈嗰晚，我打坐兩個鐘，嗰晚無燈，望上天特別多星星。
4年無覺好瞓
認識盧冠廷，全因他那獨特唱腔與一首首滿帶正能量的歌曲，令人欣喜的歌聲歌詞背後，盧冠廷卻因為「化學敏感」而徹夜難眠4年，盧Lo親述當時情況，情不自禁說了句：「當時我真係好想死……」
記：點解會加入環保鬥士行列？
張：我認為所有人都應該全力支持環保，只要你係地球一分子就有責任，Sorry，唔係責任，係義務！我喺港大學生會嗰陣，已經對政府處理環保手法好不滿，所以之後決心加入「綠色和平」，政府一向忽視環保，經濟唔好話無資金，經濟好又懶懶閒。最近「綠色和平」寫咗封投訴信，希望政府可以改善空氣污染問題，點知足足３個月都無回覆，之後有次喺公開場合見到環境局局長邱騰華，我質問佢搞乜，佢話已經收到信，家處理中，仲話3個月時間已經算快……唉，呢啲算乜工作態度？
盧：唉，你睇政府喺開發再生能源方面嘅成果，簡直係零。
張：唉，來來去去都係得南丫島風車，環保如果得到政府配合，事半功倍。
盧：我2000年投身環保行列，全因兩本書，第一本係環保組織「EarthDay」創辦人GaylordNelson嘅著作，講全球暖化問題，睇完本書，我發覺政府有好多嘢無同公眾交代，唔講即係隱瞞，所以我覺得要企出嚟做番啲嘢。又話說幾年前，我患咗個不治之症，整整4年未瞓過一覺好嘅，當時我簡直想自殺，睇醫生又話我心理作用。後來，我上網睇到本書叫《HomeSafeHome》，先知我患嘅病叫「化學敏感」，因為八十年代我做電影配樂，成日困喺電腦房所致，作者同我一樣患呢個病，解藥只得一個，就係只用Organic物品，搞到我要換晒屋企嘅窗簾床單，個病先慢慢好番。我咁諗啦，可能係上天畀Warning我，叫我注意環保。
牛肉最污染空氣
近日無意中在巴士的《Roadshow》看到盧Lo的環保節目，隱約記得他咬牙切齒談甚麼「食地球論」，奈何到站下車看不完。今次訪問重提舊論，盧Lo還語不驚人誓不休：「5年後先可生BB！」令初為人母的張韻琪頓時不知如何是好。
盧：哈哈，我唔係話食地球，係話計算食咗幾多地球資源。最近我留意到個環保網站「MyFootprint」，入面有15條基本環保問題，你作答完，就會計到你每日大概食咗幾多地球資源。
張：我都聽過呢個網站，不過未玩過，盧Lo你又食咗幾多地球資源呀？
盧：有人窮奢極侈浪費食物，每日食10個地球資源嘅大有人在，啲基本問題其實好中。香港人咁鍾意食牛肉，原來牛肉最污染空氣，因為外國養牛業用非天然飼料，牛又會排出甲烷，呢種氣體破壞力勁過二氧化碳10倍。坦白講我都食緊4個地球資源，香港實在太現代化，好多嘢都避免唔到，惟有盡量努力，我以前揸LandRover，家都換番架Smart。仲有呀，咁嘅時世，生BB都要等5年後先好生呀。
張：點解呀？我個BB啱啱10個月大。
盧：恭喜你先，不過我覺得大家再唔自愛，下一代一定無幸福，一出世就要面對咁污染嘅世界又何苦呢。我重申，我唔係叫你唔好生仔，係睇定啲先生，等多5年，睇吓世界有無改善先算啦。你個BB都要小心啲呀，小朋友好易皮膚敏感，因為一來抵抗力弱，二來污染真係好嚴重。
張：係呀，所以我屋企多數用天然物品，我都希望環境可以慢慢改善，可以喚醒更多人救救地球。
盧：只要大家出一分力，地球先至會有救……
後記
訪問尾聲，我問：「盧Lo，你最Ideal嘅世界係點㗎？期望全世界人環保，理想化咗啲喎。」「盡力啦，乜都唔做只有等死，過唔過到2050年，睇大家嘞。」我廿歲出頭，2050年肯定健在，不想這麼快死，看來要緊緊遵守二人提供的環保十誡了──
1.效法美國軍訓式洗澡，即天文台台長林超英提倡的2分鐘洗白白，省水省力。
2.把沒用的水樽灌滿水放入雪櫃，空間被填滿能減少使用冷氣，變相節省電源。
3.別使用電腦，節約能源。
4.改裝坐廁分大細冲水系統，減少污染。
5.多用天然家庭用品，別用石油提煉而成的任何產品。
6.棄鎢絲燈泡改用省電膽，因鎢絲燈泡會釋放大量二氧化碳。
7.多乘搭交通工具，促請政府容許單車進入港鐵範圍，多踏單車令人身心健康。
8.別用即棄式木筷子，變相保護森林。
9.政府改善屋宇設計藍本，令昔日屋村對流風重現，多用自然風減少使用冷氣。
10.政府應開發再生能源，效法廣東省等地區，使用太陽能熱水器。
盧Lo推介
潔廁石$149
有Bact-O-bane殺菌纖維，其水氫礦物磁石會不斷產生頻率，令水中礦物質不能依附水箱，冲水時把水中礦物質帶走，令水箱及坐廁無迹、無臭及無細菌。
火山石$195/2磅
100%天然火山石，表面小孔吸走空氣中的濕氣、臭味、煙味、輻射及化學物質，每6個月放陽光下曬一天，每3年用1:9鹽水浸30分鐘，再曬一天，可循環再用。
EM家居噴霧$200
「EM」即有用的微生物群，是沒香味的益菌，噴在冷氣機隔塵網、鞋櫃、尿兜、渠口位，可抑制霉菌及害蟲滋生，有效中和臭味，15至20分鐘見效。
FiveStars天然洗碗液$130
用菜油製造，超濃縮，一樽洗碗液可稀釋成15倍份量使用，去油能力特強，能徹底清除碗碟油迹及食物殘渣。
售賣點
綠色生活專門店（27910179）
地址：西貢沙咀街5號地下