港台節目《頭條新聞》噚日20歲生日，請咗唔少前高官權貴來贈興，包括由亞視行政總裁變做顧問嘅魔童王維基。佢曾經話過亞視衰到貼地，但魔童噚日謙稱，自佢走後亞視「已經升番好多」，又澄清話亞視唔做中央台，純粹因為唔夠資源，別無其他，講完仲好似港女咁做出V字手勢，cute爆咁話亞視已經V形反彈。
問到佢最適合做乜節目？魔童諗都唔使諗就答《頭條新聞》，事關佢已經係一則頭條新聞喎。佢仲即場請節目主持做「顧問」，不過係嗰隻鍾意就問唔鍾意就唔問嘅顧問喎，唔知係咪暗示緊自己嘅遭遇？同場女歌手謝安琪對於《頭條新聞》經常引用佢嘅歌嚟寸政府就深感榮幸，仲送首《四面楚歌》畀民望暴瀉嘅特區政府。